Anna Felder


Grond premi svizzer da litteratura 2018

Anna Felder

Tranter las litteraturas svizras è quella dad Anna Felder, ina Luganesa ad Aarau, ina cumparsa discreta, ma da gronda fascinaziun. Anna Felder è in'autura scolada che n'expona betg sia savida. Dapi ses emprim cudesch renumà Tra dove piove e non piove (1972) ha ella creà in'ovra admirabla tant pervia da sia coerenza sco er pervia da sia originalitad. Ses stil lascha pensar a numerus models, è en realitad dentant unic ed immediatamain distinguibel, malgrà la diversitad da furmas e geners, als quals ella è s'avischinada: roman, raquintaziun, teater, gieu auditiv, cumponiment. Italo Calvino, che ha sustegnì cun persvasiun il segund roman dad Anna Felder La disdetta (Einaudi, 1974), scriva ch'i sa tractia d'in text per lecturas e lecturs cun in gust exquisit. Effectivamain n'è l'access als cudeschs dad Anna Felder betg adina simpel. L'autura guntgescha las sendas percurridas memia savens ed experimentescha – sco amia da l'ellipsa – cun l'art da laschar davent. Ins pensa qua cunzunt a ses romans ils pli pretensius u difficils sco Nozze alte (1981), nua ch'ella transcriva il mitus da Philemon e Baucis en l'actualitad, u Le Adelaidi (2007), l'istorgia d'in um e da bleras dunnas, raquintada sco puzzle d'evocaziuns e da regurdientschas confusas che vegnan puspè a la glisch. Tuttina han er quests cudeschs – sco las collecziuns d'istorgias curtas pli facilas Gli stretti congiunti (1982) e Nati complici (1999) – chattà lur lecturas e lecturs e fan ussa part da l'istorgia da la litteratura betg mo en la Svizra taliana. I n'è betg difficil da s'imaginar che quai capitia er cun il tom Liquida cumparì dacurt (2017), che reunescha en in ensemble coerent ils texts da prosa dals ultims 15 onns.

Il Grond premi svizzer da litteratura 2018 undrescha la carriera d'ina autura impurtanta ch'è restada fidaivla ad in stil da scriver, nua che la musica quinta anc dapli ch'il libret e la successiun dals pleds anc dapli che l'acziun.